Flokkur: Uncategorized

… ég ráfa um ranghala matarkistur veraldarinnar. Mig langar að borða allt það ,,góða“ í heiminum sem er allra verst fyrir mig.

…nenni ekki að elda

…nenni ekki að versla

…nenni ekki að hugsa um grænmetisskammtinn

…nenni ekki að borða EKKI eftir kl 20

…nenni ekki að vera alltaf að reyna að hafa hlutina eins og þeir ættu að vera.

Er þar að auki komin með bullandi hálsbólgu og eitlabólgu, jafnvægisleysi og svima.

Fuss og svei

Hvenær ætli ég verði einbeitt á ný?

Og hvað ætla ég að gera í því þegar ég hef ekkert lést á föstudaginn í heilan mánuð?

Breyta einhverju?

Ekkert annað í boði.

En nenni ég því?

Mig vantar að láta setja mig á beinu brautina á ný. Baldur getur þú það ekki einu sinni enn? Já eða bara hver sem er? Er ekki einhver fjarstýring þarna úti sem gæti virkað á mig – einhver sem þið eruð kannski hætt að nota? Kannski er hún þarna í neðstu skúffunni til hægri heima hjá þér? Góða ýttu eða góði ýttu – best bara bæði, á rauða stóra takkann – helst nokkrum sinnum.

Gerið þið ykkur grein fyrir hve mikils virði það er…

Sigh

Ég er alltaf svöng – þetta er bara ekki normal! Getur þetta verið útaf því að ég er með hærri púls og þá brenni ég meira en áður – eða brenndi ég alveg því sama þó hjartanum væri haldið niðri? Svarið er að líklega hef ég brennt alveg því sama þó ég væri á betablokkaranum – þó að í Opruh hafi einn læknir sagt að þau séu fitandi og hægi á brennslunni.

Þetta er kannski bara eitthvað sem fólk er almennt ekkert að pæla í – en amk er ég búin að vera síðustu vikuna er ég búin að vera svo svöng og matgráðug að ég hef aldrei vitað annað eins. Og veit ég þó eitt og annað um matgræðgi ;-).

En nú ætla ég bara að fylgjast vel með vigtinni og skrá hjá mér brennsluna – hætta þessu röfli og sjá bara hvernig þetta þróast.

Fór með krakkana hálfan Votmúlahringinn – 40 mín túr svona rúmlega.

• Er á barmi taugaáfalls vegna þeirrar þjóðar sem ég hlýt að teljast hluti af
• Er hætt að vorkenna okkur þetta stjórnarfar sem við höfum búið við í 16 ár og verður kannski alls 20 ár
• Fullt af fólki sem er rúmlega þrítugt hefur aldrei búið við annað en hægri stjórn
• Völd eru skaðleg þegar þau eru lengi á sömu hendinni
• Feðraveldi er að komast á í þingflokk Sjálfstæðismanna
• Samfylkingin er komin til að vera
• Ingibjörg stóð sig frábærlega dagana fyrir kosningar en það dugði ekki til
• Ég held að happadrýgst væri að Samfylking færi í stjórn með Sjálfstæðisflokk og reyndi að tjónka eitthvað við þetta fólk og setti lit sinn á samfélagið

• Ég læt eins og mér komi ekki hitaeiningar eða gáfulegt mataræði við
• Drekk hitaeiningaríka drykki eins og mér sé borgað fyrir það og verð glöð af
• Hreyfi mig þó nokkuð reglulega
• Kimi er dottinn út úr keppninni á Barcelóna og mér er alveg sama
• Ég er líklega bara McLaren manneskja
• Ég er úti í skóla að vinna´
• Palli á afmæli í dag og er 44 ára – flott tala
• Mér fannst Serbneskalagði 1 af þremur bestu lögum keppninnar
• Rússneska sönglagakeppnin sýnir að vestur Evrópa fær það sem hún á skilið rétt eins og við hér á klakana
• Það á að vera símaatkvæðagreiðsla til hálfs í öllum löndunum.
• Eiríkur rokkar feitt

Over and out – ja nema ég á nýjan gemsa og fyrirgefið öll sem hafið fengið alls konar misgáfuleg sms síðasta sólarhringinn. Hann hefur verið strembinn – sólarhringurinn og síminn. Og nú ætla ég að fá mér kók með sykri til að jafna sykurbúskap líkamans.

Þegar ég fór að sofa í gærkveldi þá var ég algjörlega uppgefin. Þegar ég vaknaði 15 sinnum í nótt þá var ég alveg uppgefin líka, með hausverk og einhverja ólund í skrokknum. Svolitla hálsbólgu, nefið stíflað til hálfs og svo framvegis og svo framvegis.

Ég vaknaði kl. sex og hugsaði mér gott til glóðarinnar að fara með hundinn en eftir að hafa farið fram úr og litið á sokkplöggin mín og tannburstað mig og sitthvað fleira sá ég að ég gæti þetta nú ekki. Hvíld væri góð í göngunni í dag – eins og sumir eru nú að benda mér á – það þarf ekki að gera allt upp í topp.

Ekki batnaði ástandið mikið eftir því sem leið á morguninn og hafragrautseldamennskan fór alveg með mig – og ég þurfti verulegrar hvíldar við eftir hana! Sá þá þann kost vænstan að hringja mig inn veika í skólann. Það væri eins og líkaminn væri að segja mér að ég væri alveg tilbúin í einhverja hvíld. Kannski eru þetta nýju lyfin – kannski er blóðþrýstingurinn eitthvað hár eða skrítinn. Amk er meira að gera hjá hjartanu mínu – þarf að dæla helmingi hraðar í dag en á föstudaginn – eða svona allt að því – kannski bara þriðjungi. Aumingja litla hjartað mitt. Verið að messa við það hægri vinstri með lyfjum, líkamsrækt og álagi af ýmsum toga.

Ég er sem sagt heima – í bælinu því ég held varla haus. Góðar þessar fartölvur til síns brúks.

En nú ætla ég að hvíla mig svolítð. Strembin þessi morgunverk. Verst að ég er með svo mikið samviskubit yfir vesaldómnum – enskudagur í skólanum í dag – og þar með missa allir krakkarnir af henni en hvað á maður að gera þegar maður er lasinn?

Stundum bara gerist það.

Eins og þið vitið sem þekkið mig elska ég föstudaga. Og þessi í dag er sérlega ágætur eða svo virðist við fyrstu sýn.

Mér er ekki illt í ristinni – allra meina bót að væla svolítið í læknum og sjúkraþjálfurum og láta þá segja manni að það sé ekkert að manni nema æðubunugangur :-). Ég reyni að streitast svoldið á móti en verð svo bara alveg sammála (mér er samt svolítið illt í hælnum hægra megin ;-))

Stóri stóri hælsporinn virðist vera að gefa sig og pínir mig ekki mikið og bara ekkert miðað við það sem áður var.

Ég hef ekki hugmynd um hvernig mér hefur gengið í að léttast og mér er eiginlega alveg sama því ég VEIT að ef ég hef ekki lést þá léttist ég næst því þá hef ég ekki verið alveg nógu dugleg og úr því get ég bætt.

Páll er á lífi sem svo sannarlega er vert að þakka kvölds og morgna – sérstaklega þar hann var að fá yfir sig þann 1. maí heilan byggingarfleka úr tuga metra hæð. I kid you not. Kranamaðurinn missti flekann og af öllum stöðum datt hann af þar sem Páll stóð á 10 000 fm svæði – einn af þremur mönnum sem voru að vinna þar! Páll á marga vini orðið á skaðastofunni í Tórshávn og þar á bæ segjast menn aldrei hafa séð sterkari mann með eins stór og sterk bein – segja að svona bein finnist ekki í færeyskum genum!

Aumingja Palli minn – alveg búinn að fá nóg af þessum hremmingum. Ég eiginlega líka og nú vil ég bara að sterk veltigrind sé smiðuð utan um víkinginn minn sem vel að merkja kemur heim í frí allur krambúleraður og stunginn eftir viðureignina við flekann.

Ég fékk ný lyf í gær þannig að nú á ég von á því að púlsinn á mér verði aðeins líkari því sem gerist hjá venjulegu fólki en ekki fiskum á róandi!

Jamm þetta er barasta ágætur föstudagur. Líkamsrækt og hjólreiðar og yndislegt veður.

Er eiginlega of uppgefin til að blogga.

Fór til læknis í dag – hann sagði að ég væri ótrúlega dugleg! Sannkölluð afrekskona!

Líður ekki þannig….

Fætinum á mér gæti þó mögulega liðið þannig en við tvö ég og fúni fóturinn minn erum farin að sofa. S N E M M A

Illt í ökkla eða rist? Bæði? Ég held það geti verið.
Er búin að ákveða að ég verð góð á morgun. Jamm það er ég búin að ákeða. Nenni þessu ekki og þverneita að ég geti ekki gengið – ég hef alltaf getað gengið dj… hafi það.

Er ekki tilbúin til þess að gefa göngurnar okkar Bjarts eftir á morgnana. Ég hlýt bara að hafa meitt mig eitthvað…

Svo eru nú álagsverkir svoldið fínt orð líka…

En slæmir dagar í gær og í dag varðandi hreyfinguna þar sem ég er fótlama en við skulum sjá með morguninn. Og svo er hægt að hjóla í skólann á morgun ef maður bara drukknar ekki á leiðinni eins og hefði gerst í morgun.

Sjáum til. Um að gera að passa bara mataræðið fyrst hreyfingin er í minna lagi. Ja það væri það 😉

…við íþróttafélaginu mínu! Áfram svo…

Ja hérna hér.

Búin að skrifa undir við Ljósuborg. Hugsið ykkur það.