Flokkur: Uncategorized

…mér er sama hver missir af flugvél, eða verður seinn í vinnuna eða bara hvað sem er: ÉG VIL EKKI AÐ LÖGREGLAN HAGI SÉR EINS OG HÚN HEFUR HAGAÐ SÉR Í DAG!

Ég sit bara hér og fæ tár í augun – nei takk! Ég afber þetta ekki.

Hvað svo sem má segja um mótmæli almennt þá verðum við nú að fá að bera þau fram við og við – falún gong, Saving Iceland eða hvað eina. Fólk verður bara að fá að hafa skoðanir og stundum sýður upp úr og þá á löggan að vera fyrirmynd okkar og róa niður og fara með friði.

Ráðast á karlagreyin og draga þá með buxurnar niður um sig – brjótandi bíla og hvað eina. Nei takk. Ég á aldrei eftir að líta lögregluna sömu augum eftir það sem ég sá í sjónvarpinu í dag.

SVEI ATTAN Björn Bjarnason og fleiri

Ef ekki væri fyrir Nizza stykki hálfétið og ókjörin öll af súkkulaðihjúpuðum vínberjum þurrkuðum þá væri ég í firna góðum gír. En ég hef enn þá von að ég sleppi nammideginum á föstudaginn og láti þetta gott heita þessa vikuna! Já og ég nákvæmlega núna þar sem sykurinn vellur út um öll vit og ógleðin ræður ríkjum finnst mér hreint ekki ótrúlegt að ég snerti sælgæti aldrei framar 😉

Nú jæja en konan er nú samt í fínum gír:

Ég er búin að ná af mér kílóunum tveimur sem ég bætti á mig í USA eða kannski frekar vikunni þar á eftir – og hef því lést um 2 kg á síðustu viku.

Ég fer í Styrk og viti menn ég kann svona ægilega vel við mig og finnst ég svo miklu grennri betri og stórkostlegri eftir hverja ferð. Þið sem sagt megið minna mig á að þetta er mér mikils virði og gerir mér gott.

En þar sem ég er í Styrk – og ég hef jú farið 4 sinnum á síðustu 7 dögum þá bara svitna ég og svitna. Ég veit nú ekki hvursu kunnug þið eruð mínum svitakirtlum en þeir eru amk ekki mjög virkir og ég fyllist þvílíku stolti ánægju og heilagleika yfir eigin ágæti þegar einn svitadropi nær að renna niður enni mitt og ofan í auga á hverri 2 tíma æfingu. En núna – já núna – núna er öldin önnur. Mín bara svitnar og svitnar og svitnar og svitnar og þarf að hafa með sér handklæði næst því vökvatapið er slíkt útum þessar litlu holur svitans.

Nú og hvað veldur?!?

Það væri þó ekki að skila sér morgunröltið? á hverjum virkum degi í 25 – 30 mínútur stollar konan eftir Ölfusá með hund og mann – já eða mann og hund misjafnlega langt á undan sér eða til hliðar við sig, skoðar endur og syngur hamingjuóð til vorsins.

Ja það væri það? Ég náði amk fínum árangri þegar ég labbaði þarna um árið – eitt haust og vor ef ég man rétt og annað hálft haust 😉 og vonandi verður það bara raunin núna. Ef þið viljið bæta lífsgæði ykkar og gleði um 100 stig þá skuluð þið fara út að labba í morgunsárið. Þvílík byrjun á deginum. Ég hef bara verið glöð síðan ég segi það satt. Morgunmatur á eftir og komin í vinnuna klukkan hálf átta albúin að gera eitthvað smá af viti ;-). Jummi jumm

Nú annað… Beinhimnubólga. Úff PÚFF. Þið skuluð nú ekki vanmeta þann fjanda! Ég er áreiðanlega með þennan þarna síðasta og nú skunda ég til læknis og athuga hvort ég sé nokkuð í hætti með að fá drep! Nei nei ég hef nú ekki neinar áhyggjur af því en ég sem sagt fékk mér legghlífar og svo var ég nú pínu að versna í gær eftir styrk og göngurnar allar og þá svaf mín í lopasokkum í nótt að auki (er frekar sexy fyrir og svartar legghlífar og hvítir lopasokkar skemma náttúrulega ekki fyrir!). Ég er bara góð í dag og er ekki sérlega hölt og að mestu laus við þann viðbjóðslega sársauka sem fylgdi þessu helv…

Svoldið montin sko – þetta einkennir keppnisfólk í íþróttum og sú sem fann þetta svona greinilega hjá mér er nuddari og mikil frjálsíþróttakona og kannaðist við lýsinguna hjá mér – ojá. Gott að eiga góða að þegar maður á eiginlega engan sjúkraþjálfara lengur.

Sum fött þurfa að verða oftar en önnur. Þau einhvern veginn gleymast svo auðveldlega – eða þá að það er sérlega erfitt að tileinka sér þau!

Ég held ég ætti að hætta að vesenast svona mikið… Try to keep it simple…

That will be the day – híhí

Hvað ætli númerið hjá sála sé…

Nú jæja! Kannist þið við fyrstu mínútur dagsins: ..Þetta þarf ég að gera í dag“ og jafnvel ef það er frídagur ,,…ummmm þetta get ég gert í dag!“

Ég get horft á góða mynd!
Víhí það er þurrkur – hengi út á snúru
…svo gæti ég jafnvel tekið til – svoldið ,í vinnuherberginu oh það væri alveg dásamlega kærkomið!

æ svo nenni ég kannski ekki bara neinu! Læt bara lítið fyrir mér fara! Á það skilið.

…
…
…
…
…
…
…

hmmm… Polli og æfingarnar – sigh!
Skulda víst svoldið í hreyfingunni. Ganga? nah nenni því ekki! Dj ég verð að fara að fara í Styrk, ég verð að brjóta múrinn mar… Gengur ekki að láta þetta vaxa sér svona í augum…

Ætli ég komist í buxurnar sem ég keypti fyrir USA ferðina, ennþá… Klárlega ekki og ég ætla ekki að gá að því!

Svo fæ ég bara bikar í næstu viku frá Polla – skiptir ekkert öllu máli að fá þennan bikar – annasöm vika að baki og svo datt blakið nú út – það er ekki við allt ráðið svo sem…

Niðurstaðan var sem sagt sú að gera helst ekki neitt – alveg eins og sunnudagar eiga að vera!

En Inga litla er nú svoldið seig og dreif sig í buxurnar og þær passa enn og eru svo sem ekki mikið þrengri – nú og svo geystist hún í Styrk og æfði smá og ponsu efri hluta líkamann auk smá brennslu. Engin dúnduræfing en mín fór og tók hana alla – gleymdi að teygja. Fæ klárlega strengi á morgun. Sigh

Svo er bara að byrja á matardagbókinni á morgun og breyta lífi sínu hægt og bítandi til hins betra á ný.

I can do it – svo ég tali meiri úttlensku!

Ekkert um að ske. Vorið læðist inn og endunum fjölgar á Ölfusá. Heyrst hefur af lóum en við heyrðum ekki í neinni í morgun en þrestirnir eru farnir að syngja sig hása og það er bara að gerast í dag og í gær.

Bjartur er alveg að verða búinn að átta sig á því að hann hvorki getur flogið né hlaupið eins hratt og fuglinn fljúgandi. Það minnkar asann á honum til muna.

Nú þarf ég ekki að átta mig á neinu öðru en því að húsið mitt er ekki búið þeim búnaði að taka til í sér sjálft. Enginn gerir það nema ég svo það er best að átta sig fullkomlega á því sem fyrst svo innivera verði bærilegri og heilsusamlegri á köflum. En það er nú að koma helgi og þar sem ég er svona hress orðin af morgungöngunum þá hlýtur einhver tiltektargjörningur að eiga sér stað á næstu dögum.

Ég labba sem sagt enn á morgnana og vakna korter í sex – er komin í skólann um hálf átta sem er dásamlegt.´

Ég ætla svo í sjúkraþjálfaralausan Styrk og lyfta pínu pons og hjóla – koma mér í gírinn í lyftingunum. Jamm – er hálf andlaus á því sviðinu sem og mataræðinu. Vantar herslumuninn og einhvern veginn er undanlátssemin of mikil.

En nú er ég komin með tvær dagsetningar sem ég á að stefna á – ægilega fín verðlaun í boði 😀

Stjörnuspá
Hrútur: Sannleikurinn hljómar vel. En í dag gerir lygin það líka. Það er kannski mikilll munur á því sem er satt og því sem þú vilt að sé satt – en það hljómar mjög svipað

af mbl.is

Mín með besta móti 😉

Gengið á hverjum morgni – my god hvað það er undursamlegt þó það sé stundum 11 stiga frost já eða sex – þá fer þetta nú allt að koma – og ekki er Ölfusáin síðri í kuldanum en vindbelgingnum og rigningarsuddanum 😉 -Get ekki sagt ég sakni hans.

Búin að kaupa kort í styrk í 3 mánuði – ætla svona aðeins að sjá hvernig þetta þróast. En ég er voða glöð með að hafa gert það.

Þarf svo bara að muna það að nú er ég að hefja átakið – hálft kíló á viku! Muna það alltaf – ekki bara eftir að ég át kexið!

Sigh

er bara alveg stútfullt af góðum greinum. Ein sú besta þá og nú var grein Illuga um brjálaða hagræðinginn frá Yale. Ég get svarið að ég kannaðist við eitt og annað og byrjunin var algjör snilld:

,,Þegar ég heyrði í kvöldfréttum sjónvarpsins á fimmtudaginn viðtal við Gylfa Magnússon dósent í Hagfræði við Háskóla Íslands, þá hnykkti mér illa við. Því hvernig stóð á því að Háskóli Íslands hafði ráðið í svo virðulegt embætti þjóðhættulegan óeirðasegg? Var maðurinn kannski kommúnisti? Íslamskur hryðjuverkamaður? Náttuverndarsinni á vegum Saving Icelands? Eða jafnvel útsendari Baugsveldisins?

Hann hlaut að minnsta kosti að vera eitthvað skrítinn, því boðskapur Gylfa var hvorki meira né minna en sá að peningamálastjórn Seðlabanka Íslands væri ónýt.“

Svona einhvern veginn byrjaði hún. – Og boy do I know the feeling. Það er búið að kenna manni að halda að menn sem tali gegn Davíð og hans kumpánum séu bara hreinlega klikkaður og beri að loka inni eða amk forða því að þeir tali framar í fjölmiðla.

Það er sama hvort þeir eru frá Yale eða annars staðar – þeir eru ansar allir saman. Og þessi vill fá nýja menn í Seðlabankastjórn – skipta þeim Hannesi Hólmsteini (hvernig á hann nú þá að borga allar skuldirnar sínar?) og Halldóri Blöndal (jú jú hann er í stjórn Seðlabankans!!!) svo ekki sé minnst á einn bankastjórann sjálfa – Davíð Oddson sem hefur hærri laun en forsetinn sem slíkur að viðbættum lífeyrinum sem hann skammtaði sér sem ráðherra. Allt þetta fer Illugi í gegnum og gerir það listavel. Og Gylfi vill innlenda og erlenda menn sem hafa aflað sér trausts með störfum sínum – ja hérna hér. Það væri það að einhver með peningavit settist í Seðlabankann. Mér sýnist amk að Hannes blessaður eigi í nægum vandamálum með sín fjármál þó hann þurfi ekki að hafa áhyggjur af þjóðarskútunni líka.

Annars var lika viðtal við Guðmund Ólafsson hagfræðing sem kenndi mér stærðfræði í ML. Sá vildi að ég færi strax og samstundis að vinna í fiski því greind mín leyfði ekki önnur eða flóknari viðfangsefni. Ég sá þegar að maðurinn hafði ótrúlega lítið innsæi og vantaði verulega skilning á nemendum sínum – fannst hann fyndinn og kostulegur, fígúra. Eftir þetta hef ég haft gaman af að fylgjast með honum og heyra hvað hann segir. Í sumu hefur hann meira innsæi en á nemendum sínum og rétt eins og mér fannst þessi starfsráðgjöf hans vera fyndin og úr kortinu þá er svo um annað líka hjá honum. En það var svo sem rétt hjá honum að ég sýndi ekki neina snilldartakta í stærðfræðinni fyrr en ég uppgötvaði að vinkona mín lét mig ekki hafa glósurnar úr fyrsta formúlutímanum og ég hafði aldrei um formúlur, sannanir eða þetta merkilega blað heyrt fyrr en Ásmundur bað um að fá að sjá það á einu námskeiðinu hjá honum. Það var allt annað líf að hafa þessar formúlur fyrir framan sig – ég skyldi aldrei hvernig maðurinn gat fengið þessar talnarunur á töflunni til að virka svona fínt fyrr en ég fékk þær, lærði að sanna þær aftur á bak og áfram. Já það var nú meiri sælan. Það var dagurinn sem ég bara lærði að elska Algebru. En það var nú ekki honum Guðmundi mínum að þakka. Hann skrifaði á töfluna með annarri og strokaði út með hinni og skrækti svo fiskvinnslusögur að okkur er við dirfðumst að spyrja.

Já ég kunni bara vel við hann Guðmund og kann enn.

-Mér dettur eitthvað alveg magnað í hug – ah verð að skrifa þetta hjá mér hugsa ég og svo bara hviss bang man ég það ekki lengur og veit allt í einu ekkert um hvað ég ætti að blogga. Merkilegt eins og ég hugsa ótrúlega margt magnað ;-).

En svo bara man ég ekki neitt!

Sigh – aumingja þið að missa af því! Ég upplifi það þó einu sinni í smá stund rétt á meðan ég hugsa það – þó ég gleymi því svo sem um leið, samstundis og strax. Híhí!

en nóg um það!

Mér finnst mjög asnalegt að það sé búið að framlengja umsóknarfrestinn í Khí – hrmpf – þá fæ ég svar kannski ægilega óskaplega seint…ah kannski ekkert seinna en ella – vonandi ekki.

Við sóttum um þróunarstyrk í skólanum fyrir námsmatsmöppurnar mínar – já og námsmat yfirleitt. Vonandi fáum við hann – og vonandi kemst ég í Kennó til að sinna þessu líka þar – fara til Meyvants í námsmatsáfanga ó já. Vonandi kemst ég inn.

En nóg að sinni

…og það eru ansi margir föstudagar síðan íþróttataskan hefur ekki verið í aftursætinu! Enginn Styrkur og ekki neitt á planinu í dag. Nenni ekki vantar 1200 hitaeiningar til að ná markmiðum vikunnar hjá Polla – sé til hvað ég geri í því! Líklega ekki neitt…

Eitt fatt:

Beinhimnubólga er að hluti af því sem er að hrjá mig í fótunum.
Flís um kálfa stórlagar ástandið. Hef ekki verið betri í næstum ár í löppunum hvað varðar verki. Er helaum undir hælnum samt og slæm í ökklanum. Ætla að prófa hlýja sokka og eitthvað um ristarnar og sjá hvað það gerir. Aum hásin er líka að plaga mig!

Annað fatt:

(eða lygi að sjálfri mér) Nú tek ég gönguna á morgnana föstum tökum bæti svo styrkferðum inn í – í næstu viku. 1 – 2.

Þriðja fattið:

Það er undursamlegt að ganga úti á morgnana

fjórða fattið:

Ég þarf að undirbúa ákveðin verkefni mun betur en ég hef gert.

Fimmta fattið:

7 vikur eftir af skólanum.

Mörg fött ;-).

Mikið er gott að hafa helgarfrí. Og ég hef ekki farið í sjúkraþjálfun í 5 vikur að verða og þá ekki hitt eða heyrt í sjúkraþjálfaranum mínum fyrrverandi. Viðbrigði það.

Veröld Ingveldar án sjúkraþjálfarans er staðreynd.

vorleg og fín veröld og fátt að henni ;-). En svoldið gasalegt að eiga eftir að losna við 70 kíló og vera á þeim stað sem ég er núna í því öllu saman. En ég krafsa mig áfram.

Bestu kveðjur frá Ingu pingu 43 ára 😀

Þegar ég fatta eitthvað þá skil ég það mjöööög vel – alveg inn að innsta kjarna þess ;-). Nú það er sem sagt eitt að vita í mínu tilfelli en að fatta. FATT er mjög merkilegt og ég fatta allt mögulegt sem ég veit og þá verður virknin svona líklegri til að loða við mann ;-). Stundum þarf ég að fatta hlutina með reglulegu millibili – og stundum gleymast fött… Og þá þarf að byrja alveg upp á nýtt!

Hér eru nokkur nýleg fött:

Það er nokkuð vit í því sem Bandaríkjamenn nota sem slagorð gegn offitufaraldrinum þar, fitandi mat og skammtastærðunum – sem eru vel að merkja ROSALEGAR: Make the right choice – boy hvað þetta snýst um það alltaf hreint. Fækka hinum – útrýma erfitt ef raunsæið ríkir en fækka þeim verulega.

Það er mjög mikilvægt fyrir mig að fara að sofa klukkan 10 og ekki seinna. Þá vakna ég eins og fjöður klukkan sex – get sprangað út með hundinn og átt svona líka ljómandi dag

ahhh nú datt ég út þar sem ég var trufluð og klukkustund leið. Öll fött gleymd…

Kannski man ég þau síðar 😉

Kveðja Inga sem er allt í einu fattlaus!