Author: ingveldureiriks

Hér er nú gott og gaman að líta við endrum og sinnum. Ég sit hér úti í Sunnulæk og lít yfir sviðið, er búin að kíkja í dagbókina og sjá hvað ég var að hugsa á föstudaginn, en það var nú ýmsilegt. Mér getur enst verkefnin langt fram eftir degi, en þó er margt komið í stand af því sem gera á í næstu viku. Það er góð tilfinning. Rétt eins og ég spáði fyrir um í síðustu viku þá gekk síðasta vika firna vel, og mér finnst ég vera komin með góð tök á þessu öllu saman. Krakkarnir eru orðnir vanir fyrirkomulaginu og búnir að læra á hvernig þetta getur allt gengið fyrir sig á eðlilegum degi. Sem sagt ánægður kennari við störf á sunnudegi.



Síðasta vinnuvika var 57 tímar – það er ekki nema von að ég hafi getað skipulagt mig, en nú skrái ég hjá mér hvað ég geri og hve lengi ég vinn hvern dag. Þarna eru ekki nema 10 tímar sem ég fæ ekki borgað fyrir – en ég fæ sálarró í staðinn. Ég er líklega kennari fyrst og fremst, annað er bara gert í hjáverkum eða ekki.

Hó hó hó – mín bara komin útí skóla. Svaf bara út – þrátt fyrir góð fyrirheit um að vera komin hingað rúmlega sjö – næstum níu verður bara að duga. Ég er með langan lista yfir verkefni, það eru kennaranemar, fyrirlestur á Ljósafossi og hvur veit hvað auk venjulegra verkefna.



Ég er nokkuð einbeitt þessa dagana – við Dísa unnum saman hér á föstudaginn og hófum gott starf með nokkra nemendur og ég hlakka til formfestunnar sem er framundan í skólastarfinu á næstu vikum – og jafvel mánuðum. Ég held við séum komnar með nokkuð gott skipulag sem ætti að nýtast nemendum vel og okkur. Svo er bara að vona að það finnist manneskja til þess að vinna með okkur í teymi tvo daga vikunnar. Það er vissulega aukapóstur hve varðar samstarfið og halda þeirri manneskju upplýstri – því ekki verður hún hér til þess að sinna undirbúningi á mánudögum – og því þarf að vera með fast land undir fótum á fimmtudegi. Svo er spurning hvernig hennar (manneskjunnar sko) viðvera er.



Ég fór út með Bjart í morgun þegar hann vaknaði og lét hann pissa – honum finnst mjög ógeðslegt að feta sig um í slabbi en í gær var hann ánægðari þar sem bara var klakki að stríða honum. Það er ágætt að það sé ekki manndrápsveður upp á hvern dag – hver pissupollurinn og skítahaugurinn sem missir sig er vel þeginn.

…eða það vona ég. Hann byrjar að minnsta kosti ágætlega. Ég svaf og svaf enda fór ég ótrúlega seint að sofa á minn mælikvarða eða rúmlega 24:00, svo las ég svolítið í Englum og djöflum sem mér finnst afskaplega skemmtileg bók – næ betra sambandi við hana en Belladonnaskjalið – þó ég hafi verið nokkuð ánægð með hana.

Það er nú rúm vika síðan ég fékk flensuna og nú er allt að losna – bæði útum húð og öndunarfæri, en skrambi er þetta þaulsetið. Ég ætla að taka það rólega um helgina – koma smá standi á húsið og vinna úti í skóla í fyrramálið og vona að það dugi til að ég verði hroðalega hress í næstu viku.

Ég er búin að skúra, taka jólaskreytinguna af stakketinu og næstum hengja hundinn. Ég áttaði mig ekki alveg á því hve hann er léttur og þegar ég var eitthvað að hagræða ólinni hans úti þá vissi ég ekki fyrr en hann hékk í lausu lofti og sveiflaðist til og frá – litla skinnið. Enda fór það svo að hann fékk yfir sig nóg af svellinu, bleytunni og ólinni og fór bara inn og hágrét. Já jafnvel hvolpar með ljónshjarta geta fengið nóg!

Við Ragnheiður vorum annars að velta því fyrir okkur hvort hann væri grimmur og vondur hundur. Hann tekur svoleiðis spretti að ég verð bara alveg dauðhrædd. Við ákváðum að reyna að blíðka hann, tala fallega til hans, strjúka honum og knúsa alveg úr hófi næstu daga. Og ég er bara ekki viss um nema hann sé nú þegar farinn að lagast greyið.

Hann er óskaplega skynsamur en líka svoldið fastur á sínu – vill t.d. gelta og láta dólgslega þó honum sé bent á að láta af þeim ósiðum. Vonandi tekst okkur að koma í veg fyrir að hann verði geltinn – það var hægt við Trítlu og verður vonandi líka hægt með hann. Nú sefur hann greyið ó horninu hér við hliðina á mér og ég skil ekkert í því að mér skuli geta fundist nóg um á köflum. Litla sílið…..

Hann verður nú ekki lítill lengi – hann stækkar og stækkar. Okkur finnst hann lýsast og vonandi verður hann Bjartur í sál og sinni. Ég var að skoða mynd af Bangsa hennar Trítlu og þá er hann ótrúlega ljós, hann var miklu gulari þegar hann fæddist en Bjartur og því ætti sá litli að lýsast. Litla þríspora krúttið.

Jæja ég ætla að reyna að skælast út í bíl og ná hjálpa Dísu til að ná í bílinn en hún var hjá Hildi í gær og það er eiginlega ekki göngufært hér úti því það er svo ofboðsleg hálka – svakaleg og kvarðanum 10 er hún 10.

…að ég kem mer aldrei til að blogga. Langar samt til þess því ég hugsa eitt og annað sem kannski yrði gáfulegra ef ég setti það á blað. Það er ægilega margt sem fer í gegnum hugann á mér þessa dagana. Kennslan, Trítla, síðasta ár, Bjartur, Færeyjar og ég veit ekki hvað og hvað.

Gagnrýni í Mogganum, hörmungar í blaðaútgáfu, fjölmiðlafrumvarp og eignarhald. Sigh. Gardínur, drasl, þvottur og ég veit ekki hvað og hvað.

Hvernig á maður bara að komast út úr þessu öll? Kannski með því að vera duglegri að blogga.

Kersins Bjartur 7 vikna

Það er nú ekki lítið sem gengur hér á útaf þessum litla manni sem kom til okkar þann 1. janúar 2005. Hann kann að láta fyrir sér fara og það sem meira skammast sín ekkert fyrir það.

Ég er að æfa mig í því að setja inn myndir á þetta blogg í flensunni, er að verða svoldið þreytt á að lesa bækur, snýta mér og hósta. Þetta hlýtur samt allt saman að fara að koma – enda búin að vera lasin í 6 daga.

En nú þarf ég að taka dót upp úr gólfinu þar sem erfðaprinsinn er að éta einhverja bévaða óhollustu – meira seinna

Árið 2004 hefur verið tíðindasamt ár hjá mér. Og ekki allt jafn skemmtilegt. Reyndar finnst mér miklu fleira leiðinlegt en skemmtilegt sem gerst hefur nú í ár – en tilfinning mín er samt sú að flest það sem gerðist verði til góðs. En mikið þykir mér ferðin vera bumpy….

Nú er fimmtudagur – tíhíhí – nei nei það er föstudagur. Palli vill bara að það sé fimmtudagur – finnst eins og það vanti eitthvað af tíma í þetta verkefni. Skil nú ekkert í því.

Mér er hætt að vera jafn gasalega illa við plastið – þetta birkilitaða sem við keyptum kemur svona ljómandi vel út og það er eins og Páll hafi aldrei annað gert en leggja parket. Það er nú svei mér skemmtilegt.

Nú ætla ég að fara að taka svoldið til – finna kaffikönnuna og svona og setja upp eldhús í vaskahúsinu – amk þannig að hægt sé að fá sér kaffi.

Parket klárast um miðjan dag og þá förum við að líta á skápana og kannski einhverja málningarvinnu.

Smellið á fyrirsögnina til að sjá innréttinguna

1. dagur

Milliveggur tekinn niður í eldhúsi á milli borðstofu, og efri skápar og búrskápur sett inn í vaskahús. Skáp þaðan og þurrkskrímslinu hent út. – Glæsilegur afrakstur.

2. dagur

Ákvörðun tekin um að leggja alódýrasta gólfefni á miðrýmið því ótækt er að hafa kubbaparketið holótt og illa farið hjá nýrri innréttingu. Þar með hófst brottflutningur gamla gólfefnisins og dúksins þar undir á haugana.

Einnig var tekin ákvörðun um það að setja ískáps og ofneininguna á millivegg milli herberja, til þess að mynda gott miðrými og svigrúm til þess að halda dansleik í kringum og uppá borðstofuborðinu.

Þungu fargi af mér létt – gangsyndrómið fer algjörlega, og mikið rými myndast í kringum eldavél og ofn. Líst ógeðslega vel á þetta – Palli ekki eins hrifinn og Aðalsteinn alveg á bömmer yfir því að eldhúsið sé komið út á gang og aumingja tengdó skilur bara ekkert í þessu.

Keyptum plastið – held ég hafi keypt of ljóst – held það sjáist mest á því – en það kannski verður til þess að við hendum ógeðinu af fyrr…. Er mjög lítið hrifin af þessu gólfefni

Um miðnættið smíðaði Páll fyrsta hluta veggsins utan um ofninn og ískápinn.

3. dagur

Sofið út – eins og letihaugum sæmir 😉

Klárað að taka af gólfinu og farið á haugana. Borða súpu hjá Dísu í hádeginu. Kemur í ljós hvað meira verður gert. Kannski kemur stærsti hluti innréttingarinnar í dag. Ég held að Páll hljóti að þurfa að finna einhverja til þess að hjálpa sér.

Um miðnættið kláraðist veggurinn, dúkurinn allur farinn af og parketlögn bíður handan hornsins.

Ikea sagði að innréttingin kæmi eftir 3 daga til okkar – sem sagt í dag en þegar ég hringdi var nú tíminn sem kemur að koma þessu á flutningabíl orðnir 4-5 dagar. Ég bað þær nú vel að lifa og vinsamlegast senda þetta í hvelli – karlinn yrði ekki á landinu lengi. Nú er spurning hvað gerist í því. Ef maður þarf að bíða í 5 daga eftir flutningabíl þá er nú betra að fá bílstjóra til að sækja þetta eftir sólarhring en það er tíminn sem það tekur að tína innréttinguna saman hjá þeim Ikea mönnum.

Hrmpf – ætla samt ekki að láta þetta pirra mig – er samt minnug þess að þeir hjá IKEA gleymdu og týndu innréttingunni hans Aðalsteins einhvers staðar og það tók sko viku að fá það sent,

Inga

Komið þið sæl kennarar sem aðrir

nú er illa komið fyrir forsætisráðherra vorum sem stigið hefur á stokk og talað um umtalsverðar launabætur tilhanda kennurum. Í fyrsta lagi gleymir hann að hann á að vera forætisráðherra þjóðarinnar allrar – ekki bara sumra og svo held ég að hann hafi e.t.v. bara betur setið við sinn keip og látið sem sér komi þessi deila ekkert við.



Mig langar til þess að benda ykkur á að hugsa um hvað er í raun og veru í boði.



Fyrir um tveimur árum var ljóst að kjarasamningur sem nú er unnið eftir gekk engan veginn upp og þá gafst strax tóm til þess að íhuga hvað hefði farið úrskeiðis og sveitarfélög rétt eins og kennarar hefðu þá átt að setjast á rökstóla og endurskoða málið – það var ekki gert og það verður heldur ekki gert þegar og ef þessi voðalegi pappír fer í gagnið sem Ásmundur lagði nafn sitt við og nefndur hefur verið miðlunarttillaga.

Ég er því lítt gynkeypt fyrir þessum 130 þús kr. sem okkur eru boðnar við samþykkt. Ég lít á þær sem sárabætur fyrir að ekki var samið í mars þegar menn hefðu átt að gera það. Mér finnast þær ekki nokkur plús í stöðunni og koma aldrei til með að lenda í vasa okkur. Helmingurinn fer í skatt og hinn helmingurinn fer í að vinna upp þá 10 daga sem við skuldum sveitarfélögunum. Mér þykir einhver 70 þús kall ekki merkilegt -því hitt lendir aftur hjá sveitarfélögunum og ríkinu.

Ég álít það mikið glappaskot að hafa tekið út pottinn – þó ég viti að Jóna Björk og fleiri séu mér algjörlega ósammála – mér finnst að kennarar eigi að eiga sér framgangskerfi eins og t.d. hjúkrunarkonur. Komið hefur á daginn að brottfall þeirra og krafan um það er stórkostlega kjaraskerðing – STÓRKOSTLEG, sem engan veginn vinnst upp á samningstímanum. Kjarabætur okkur sem erum 40 – 55 ára á samningstímanum fyrsta árið er um 5% launahækkun, og hin árin þrjú er um hreina tekjuskerðingu að ræða – og það enga smá. 1. ág. megum við allar búast við því að lækka verulega í launum.

Það er í raun algjörlega fáheyrt að það sé tilgreint í fylgigögnum með kjarasamningi að tekið sé fram að greitt sé fyrir yfirvinnu – að þau okkar sem viljum vinna 28 tíma í stað 26 fáum virkilega greitt fyrir það – já svo er nú komið að tilgreina þarf að kaup sé greitt til kennara. Segir e.t.v meira en mörg orð.

Ef enginn kjarasamningur væri í gildi næstu fjögur árin yrði mín eina hækkun á næsta ári þar sem ég verð 40 ára – en ég gef mér að ég haldi 4 launaflokkum út tímann – sú hækkun er um 11 000 krónur en þar sem Ásmundur af örlæti sínu og sveitarstjórnir vorar sem við kusum ætlar að bæta um betur og borga mér 14000 þús krónur í viðbót þannig að í maí 2008 verð ég ekki með 209 þús heldur 223 þús sem er náttúrulega ekkert annað en hneisa og móðgun. Ég hef heyrt að e.t.v. standi einhverjir launaflokkar eftir í pottinum – en það er ekkert sem neinu nemur í þessum útreikningum.



Ég skora á alla kennara og skólastjóra að fella þessa miðlunarttilögu og bjarga þar með kennarastéttinni frá ævarandi smán og þeim örlögum að verða jafnvel enn meiri láglaunastétt en nú þegar er.



Hugsið ykkur bara stöðuna ef þessi fjandi verður samþykktur – það yrði okkur til stórkostlegra skammar og til þess að aldrei yrði tekið mark á okkur framar. Til hvers að greiða með verkfalli ef þetta er það sem er í boði?

Ég segi nei,

baráttukveðjur

Ingveldur

Hó og hí – skyldi þetta vera síðasti dagurinn í verkfalli – í bili?

Sú saga gengur á RUV að miðlunartillaga komi frá Ásmundi í dag sem gangi ívið lengra en tilboð sveitarfélaganna gerði fyrir helgina.

Ég er búin að vera að velta fyrir mér síðasta útspili sveitarfélaganna – og það eina reyndar sem hefur komið fyrir utan launanefndina, að hækka bara launin um 25% og vera ekkert að hringla í öðru og þann frasa að kennarar eigi bara að vinna frá 8-4 og ekkert vesen með það. Ekkert vesen með vinnutímaskilgreiningu. Ég er að verða svolítið þreytt á þessu stagli. Ekki veit ég hvenær kennarar vinni nema þá frá 8 – 4 – það er jú þá sem skólinn er og í kjölfarið þessi 9,14 sem skólastjóri ráðstafar og svo bætist náttúrulega við undirbúningstíminn. Þannig að kennari sem sinnir sínu starfi hreinlega hlýtur að vinna samasvarandi vinnutíma hvort sem undirbúningurinn fer fram um helgar, að kvöldi eða snemm morguns. Fólk þarf ekki að hafa nokkrar áhyggjur af slugsi kennara nú orðið – heldur hinu. Vinnuálaginu og kröfunum.

Þær eiga ekki eftir að minnka með árunum, þær hafa jú aukist ár frá ári og engin ástæða til þess að halda að svo verði ekki áfram. 25% launahækkun breytir engu um það. Vinnutíminn verður alveg eins svínslegur og yfirþyrmandi. Ég er með með tæpar 200 þús í laun sem þýðir að í lok samningstímans hef ég 250 þú sem þýðir að ég fæ útborgað í lok árs 2008 um 150 000 kr. Og ég á alveg eftir að vinna jafn mikið – jafnvel bara meira – því alltaf verða málin flóknari og flóknari. Er það ásættanlegt?

Sem sagt ég held að eina lausnin sé að gjörsamlega stokka þetta upp og hugsa upp á nýtt heila dæmið.

Ein hugmyndin sem ég hef er að þáttur stuðningsfulltrúa verði minnkaður og kennarar ráðnir í staðinn, án nokkurs dóms yfir þeim er við þau vanþakklátu störf starfa. Ég er ekki frá því að í árgang eins og þeim sem ég kenni kæmi sér betur að fá kennara inn á þeim launum sem stuðningsfulltrúarnir tveir fá og með honum ábyrgð og undirbúningstíma – sem svo bætist við vinnu sem sérkennari leggur fram og þannig má e.t.v. ná fram meiri stuðningi en með tveimur stuðningsfulltrúum. Mér finnst þetta amk vera hugmynd sem má skoða – og enn ítreka ég að ég er ekki að leggja dóm á fólkið sem sinnir stuðningi – öðru nær, heldur starfinu sem slíku – sem er hálfgert viðrini innan veggja skólanna. Lítt skilgreint og tvinnast illa saman við starf kennarans því ekki er ætlaður tími í þann pakka.

En aftur að tiltektinni,

Inga