ingveldureiriks

Áramót og sitthvað fleira

Ég hef eiginlega verið að humma það fram af mér að byrja hér á einhverjum pistli um síðasta ár og hið nýja sem nú trítlar inn eftir gangi eilífðarinnar. Strax er einn dagur að baki og annar framundan. Sá þriðji er á morgun og þá er eins og hið ókomna hætti að vera einmitt það heldur verði að hversdagsleika nús-ins.

Ég hef aldrei verið sérlega hrifin af gamlársdegi. Hann og nýársnótt hefur verið mér kvöð frekar en nokkuð annað – þessi skylda manns að skemmta sér, vera helst svolítið hífaður – já eða mikið, vera saman og síðast en ekki sísta óviðjafnanlega glaður en þó agnarsmá daufur í bland. Ég hef heldur aldrei – fyrr en nú áttað mig á þessu fári um að áramótin séu skil – nýtt upphafi og því beri að íhuga og ígrunda um leið og horft er fram á veginn og kúrsinn tekinn. Fyrr en nú… Þessi áramót skil ég þetta einhvern veginn miklu betur – og mér finnst meira að segja eins og ég bara verði að íhuga og ígrunda alveg undir drep til þess að nýta mér þessi ósýnulegu mannanna verk – áramótin sem best.

Hin síðari ár hef ég náð nokkurri sátt við uppistandið sem á að ríkja þennan dag. Fundið minn farveg- eyði deginum í að elda einhvern ótrúlega góðan mat, stundum dettur einhver í heimsókn og við spjöllum saman á meðan ég brytja grænmetið og drekkum jafnvel freyðivín eða Blush með.

Það er svo sjaldan sem ég elda eitthvað gott eða gef mér tíma í það og því er þessi eldamennska á síðasta degi ársins kærkomin og hreinlega notaleg. Nú síðustu tvö ár höfum við farið með Bjart útfyrir á í bílnum og setið þar og horft á dýrðina. Í ár sluppum við, við að gefa Bjarti róandi eins og í fyrra enda er hann ekki nærri eins hræddur og t.d. Trítla var og í reynd bara svolítið rólegur yfir þessu öllu saman nema þegar gólfið í húsinu nötraði við sprengjudyninn.

Í ár var flugeldadýrðin sérlega glæsileg og það var ótrúlegt að sjá þennna ljósaleik mannanna bera við sjóndeildarhringinn. Í fyrsta skipti í 21 ár keyptum við enga flugelda hjónin. Fengum þetta bara beint í æð frá samborgurum okkar hér í Árborg – takk fyrir það!

En já…

Eins og þið sjáið þá er ég að humma uppgjörið og framtíðina svolítið fram af mér. Þetta er greinilega ekki alveg einfalt mál! Síðasta ár var svona með þeim flóknari á lífsleiðinni, ekki vegna atburðarrásarinnar heldur hins hvað stúlkan ég hugsaði og fékkst við í eigin kolli :D.

Þess vegna fannst mér svo upplagt að hefja árið á Þingvöllum. Viðurkenna og umlykja þá staðreynd að þeir eru mér kærir þó þar sé nú ekkert nema samkomustaður fólk. Bærinn orðinn að veislusal og sumarhúsi þeirra sem ráða, kirkjan músétin, skrefin okkar allra löngu horfin úr garðinu og trén vaxin yfir önnur. Þetta er samt minn staður þó hann sé almenningseign um leið. Enginn getur tekið – og enginn er heldur að reyna það, minningarnar frá mér sem margar hverjar eru svo bundnar öðru fólki, t.d. Björk, systkinum mínum og einfaranum mér. Stundum finnst mér eins og Núpverjarnir telji sig eina eiga minningar – vísast af umkomuleysi mínu þar sem ég kom ekki til sögunnar fyrr en löngu síðar. Stundum hefur mér líka fundist að ég ætti engar minningar ein og sér – allt sem ég gerði sem barn hafi verið upplifað af öllum mínum systkinum – bara fyrr. En auðvitað er það ekkert þannig – ég á mínar minningar sem eru bundnar órjúfanlegum böndum, samofnar Þingvöllum.

Ég labbaði endalaust um vellina, gjánna, túnin og vestari hallinn – heilu og hálfu dagana var ég í leiðöngrum oftast ein. Ég skil það núna afhverju mér finnst hreyfingin góð, göngurnar um náttúruna betri en þær sem ég fer eftir steinsteypunni. Ganga er hreinlega órjúfanlegur hluti af bernskunni minni. Ég held að varla hafi liðið sá dagur að ég fór ekki út að labba á Þingvöllum. Enda sagði mamma að það hefði komið snemma í ljós hve mikill göngugarpur ég var. Hún sagðist aldrei hafa séð barn vera jafn duglegt að labba og mig – Dísu og Ása til mikillar armæði vænti ég því oftast var ég kjagandi á eftir þeim – algjörlega óbeðin og ekki sérlega velkomin.

Já Þingvellir er góður staður til þess að hefja 2007 á.

Og nú held ég að ég hvíli um sinn og íhugi aðeins betur 2006 – kem svo innan tíðar með vangaveltur mínar þar um. Þar má finna grunninn að 2007 svo mikið er víst. Þar byrjaði ,,lífsstílsbreytingin“ – orð sem mér leiðist nú svona frekar en verknaðurinn er betri 🙂 þó seint verði hann sagður auðveldur.

Ganga

Þingvallaferð í upphafi árs

Við Palli og Bjartur fórum á Þingvöll í dag í algjörlega yndislegu veðri. Mér fannst gott að hefja árið á þessum stað sem var mér svo kær og er það líklega enn. Þingvellir eru líklega eins og minn vinstri fótur. Órjúfanlegur hluti sem ég veit varla af.

Veðrið var algjörlega stórkostlegt og birtan – … já birtan, – hún var eins og hún getur hvergi verið nema á Þingvöllum held ég svei mér þá. Dásamlegur dagur sem sagt. Góð byrjun og góð ganga þó herra Bjartur hafi náttúrulega ekki verið alveg upp á sitt besta!

Hér má finna myndir!

Verst að ég var ekki með púlsmælinn

Og svo fórum við til Bangsa og Steinunnar á Heiðarbæ í kaffi!

Uncategorized

Nafnlaus auglýsinga comment eiga hreinlega ekki heima hér

Kæri nafnlausi auglýsandi!

Hér á þessari síðu rausa ég um mig og mitt og öllum er velkomið að tjá sig um það, hafa skoðanir á því þar sem ég hef kostið að birta það á almennum miðli. Þeim almennasta sem til er – internetinu sjálfu. Jafnvel þó efnið sé í meira lagi persónulegt eins og t.d. myndin hér að neðan.

Ég hef unnið við vefmiðil og þekki óritaðar og ritaðar reglur þess ágætlega – ég þekki einnig almenna kurteisi ágætlega – þó hver skilgreini hana fyrir sig.

Ég set tengla inn á aðrar síður sem ég vitja oft og hef áhuga á og er því þar með e.t.v. að auglýsa þær um leið. Fólk lítur hér við, sumir skrifa eitthvað notalegt handa mér í baráttunni við sjálfa mig á meðan enn fleiri lesa bara og hafa vonandi eitthvað gaman af að fylgjast með mér vegna tenglsa þeirra við mig eða þekkja einhver viðfangsefni sem ég fæst við. Ég hef ekki sett tengla inn á magaminnkunarsíður hversu ágætar sem þær aðgerðir reynast öðrum. Ég fæst hins vegar við hlutina á annan hátt. Útfrá því að breyta um lífsstíl, -með því að hugsa um þessa þætti: hreyfingu, mataræði og hvíld.

E.t.v. á þessi síða sem vísað er í, í tvígang í ,,commentum“ hér eftir að vekja áhuga minn og vonandi á hún eftir að ganga vel og öllum þeim sem velja þá leið sem titill hennar vísa til. Ég biðst hins vegar undan auglýsingum um þessa síðu í nafnlausum commentum hér á mínu bloggi.

Þú myndir hvort sem er ná betri árangri kæri auglýsandi ef þú segðir frá þér, kynntir þig og segðir hvað ræki þig hér inn á þessa síðu annað en leitarorðið magaminnkun á google þaðan sem þú komst hér inn fyrst.

Það er óviðeigandi að nota aðrar síður en sína eigin til auglýsinga sig nema með gjaldi eða leyfi og ég frábið mér þær nafnlausar í tengslum við bloggfærslur sem eru runnar undan einhverjum allt öðrum rifjum en þess að fara í magaminnkun.

Þér er hins vegar velkomið að kynna þig með formlegum hætti og síðuna þína og vísa til þess hvernig þú álítur hana geta tengst og hjálpað fjölskyldu minni og vinum sem fæstir þurfa þó á nokkurri magaminnkun að halda.

Vonandi lítur þú hér við þér til ánægju á nýju ári – en lætur auglýsingaherferð þinni hér með lokið.

Bestu kveðjur Ingveldur

þunglyndi

Nú árið er liðið I

Nú nálgast uppgjör ársins. Þetta hefur verið viðburðaríkt ár í meira lagi og full ástæða til þess að gera því skil. En það er e.t.v. ekki úr vegi að skella stöðunni í dag upp á þetta blessaða blogg.

Mér líður á stundum sem ofskreyttu jólatré og miðarnir eru ekki allir sérlega fallegir eða skemmtilegir. Sumir þeirra eru eldri en aðrir en allir eru þeir mér á einhvern hátt ókunnuglegir þó svo að ég hafi átt að kannast við þá suma.

En amk er staðan sú í dag að mér finnst eins og þeir hafi aldrei þvælst fyrir mér sem nú :-). En það er líklega vegna þess að ég er að gera eitthvað í þeim.

Áramótaheitin hljóta að tengjast þessum miðum öllum saman – svo mikið er víst.

Með því að smella á myndina er hægt að sjá hana stærri

Uncategorized

Jólatré jólatré

Ég er bara algjörlega heilluð af jólatrénu mínu :-). Fékk mér nýtt jólatrésskraut núna fyrir jólin og ég er svooo ánægð með það að það er gasalegt. Verð að leyfa ykkur að njóta! Já svo ekki sé nú minnst á það hve ánægð ég er með að það er komin stafræn myndavél á heimilið á ný! Aðalsteinn er svo góður að leyfa mér að nýta hana með sér :-).

Púls

Brennslupúls

Þar sem ég er stoltur eigandi af Polar F11 púlsmæli þá á ég klárlega eftir að tala svolítið um brennslupúls á næstunni. Samkvæmt mínum útreikningum ætti hann að vera í kringum 110 – frá 100 – 120 segir Baldur. Polar vill að hann sé hærri þarf að athuga afhverju það er en það liggur áreiðanlega í einhverri svona vitleysu ala fljótfærni ;-). Polar vill líka meina að ég sé í voða góðu formi – barasta í elite flokki þegar kemur að einhverjum fínheitum sem ákvarða ástand hjartans – ég á nú eftir að prófa það á fleirum. Hef ekki trú á að sú sé raunin! Þó held ég reyndar að hjartað sé fínt og súrefnisupptakan hjá mér þegar læknirinn minn mælir hana er nánast eins og hjá langhlaupara sagði hann en samt… Það er einhver sérkennileg skekkja í þessu hjá mér.

En nú væri gaman að tala svolítið um morgunbrennslu þar sem ég fór út að hjóla í morgun áður en ég gerði nokkuð.

Púlsinn hjá mér var þá 30% af einhverju sem Polar vill (eða amk held ég að hann vilji það)að hann sé sem er nú eiginlega lygilegt en ok ég voða hvíld og svona (var nú samt búin að setja í eina vél og hengja upp og eitthvað heimilisdútl) en já svo fór mín að hjóla og það var sama hvað ég hjólaði hratt – var komin í hæsta gír og fannst ég fara óguðlega hrædd miðað við hræðslu mína við að detta. Það var sem sagt sama hvað ég djöflaðist ég komst ekki nema upp í 54% . Það var sama hvað ég breytti um takt, færði til beltið, bleytti nemana og allt – ekkert breyttist.

Ef þetta er rétt – þá skil ég þetta með að það sé mikilvægt að koma brennslunni af stað á morgnana – oh my god! Ef ég er bara á núlli og nixi þrátt fyrir 20 min djöfulgang á hjóli þá skil ég þetta ,,röfl“ hans Baldur míns um morgunbrennslu…

70 hitaeiningar fóru þó í þessu hjóleríi

Á nú samt eftir að sannreyna þessar tölur betur.

Og nú langar mig mest í heitan pott í lauginni…

Ummm það væri dásamlegt. Á nú eftir að sjá hvort ég nenni.

Þyrfti líka að læra svolítið betur á þennan ofurpúlsmæli… Svoldið flottur skoho… Svo gæti maður keypt sér skrefamæli – km mæli á hjólið já og lukt jafnvel ;-). Maður þarf eiginlega að vita hve langt maður fer finnst ykkur það ekki ;-). Það er svo margt sem maður þarf að vita að það er rosalegt!

Frænkurnar Ragnheiður og Ágústa í jólaskapi!

p.s – að kvöldi sama dags: Fór í sund með Polar vini mínum sem sagði mér að ég hefði brennt 270 hitaeiningum á þeim 22 mín sem ég var að svamla í lauginn en mestu brenndi ég þegar ég gekk fram og til baka í lauginni, því ég var ekki með blöðkurnar en þá eyði ég meiru. En sem sagt voða gott að fara og hreyfa sig þó maður sé með hálsbólgu. 350 hitaeiningar í dag í hreyfingu – þær eru þá ekki eftir!

Ganga, hjól, jól

Jólin eru komin

Gleðileg jól segi ég nú bara enn og aftur!

Sumir eru svo óheppnir að þurfa að vera að vinna í dag. Óskaplega er ég fegin að þurfa þess ekki enda sprengurinn fyrir jól þannig upp settur að maður þarf að hvíla sig í marga marga daga eftir hann!

Stundum hugsa ég – alltaf eftir á, afhverju voru þessi ósköp öll í gangi hjá mér? Hefðu gjafirnar ekki mátt vera færri, tiltekin tilkomuminni (svarið við því er nú alltaf strax og í hvelli, nei minni mátti hún nú ekki vera). Snúast jólin um öll þessi læti sem eru í mér fyrir jólin? Kannski hefði verði meira gaman að vera minna þreytt á aðfangadag og geta notið alls aðeins betur.

Í ár hugsaði ég þetta svolítið fyrir jólin. Reyndi að vera skynsöm en aðstæður spila nú ekki alltaf með mér í liði og gera mér svolítið erfitt fyrir. Og svo finnst mér þar að auki svolítið gaman af veseni ;-).

Ég vil gjarnan geta tekið almennilega til í jólafríinu – ekki endilega útaf jólunum heldur hinu að þá er ég í fríi og ég fer ekki í frí aftur fyrr en um páska. Ef ég kemst ekki niður úr bunkanum í þessu fríi þá kemst ég það bara alls ekki neitt!

En þessi sprettur tekur svolítið á – ég skrifa það þó ekki á jólin – ég elska jólin enda ekki furða:

Á aðfangadag var besti hamborgahryggur í heimi í matinn, eldaður eftir kúnstarinnar reglum sem margborgðu sig!

Ég fékk svo fallegar gjafir að ég man ekki eftir öðru eins – það skilar sér undir jólatréð að eiga tvö vinnandi börn 😉 elsku litlu grjónin mín- en nánar um gjafirnar síðar!

Á jóladag horfði ég á sjónvarp og las. Við Palli fórum svo í heljarinnar göngu um Þrastaskóg þveran og endilangan – heldur of langan þar sem flóð komu í veg fyrir að við færum okkar venjulega 40 mín göngu og við vorum því í rúman klukkutíma. Færið var ömurlegt – holklaki og drulla og því reyndi mikið á þó ekki væri farið hratt yfir :-). Að því loknu fengum við okkur hangikjöt hjá tengdó og beint í bólið þar á eftir að hvíla mína þreyttu fætur.

Í gær lá ég og horfði á myndir, las og svaf allan heila daginn og kunnu því svona líka ágætlega. Og nú er ég að fara út að hjóla. Reyna að losna við þessar ókennilegu gastegundir sem hafa heltekið meltingarveginn í mér!

Ég held reyndar að hangikjöt og hamborgarahryggur sé eitraður matur. Getur bara ekki verið hollur!

Uncategorized

Þorláksmess–a :-)

Iss ég held að áætlanir séu bara svona mest til þess að gera ekkert með þær – gæti maður ekki sagt að þær væru svona til viðmiðunar? Jólaundirbúningsáætlunin mín er nú svoldið öðruvísi í verki en á bloggi en það er allt í lagi :-).

Hér er allt í hæfilegri vitleysu en:

Jólakveðjur óma
Hangikjöt mallar við suðumark
Jólagjafir lúra hér og þar um húsið
Kertin loga innan um ókunnulega hluti sem eru á vitlausum stað 🙂
Bjartur er úti á bletti að rífast við gesti og gangandi 😉 og keyrandi
Úti er yndislegt veður
Jólatréð virðist vera alveg tilbúið fyrir skautið sem er nú mikill munur!

jól, nálar, Nudd

Anda inn alveg ofaní maga, anda út…

alveg eins og þú sért að hella úr tunnu! Ég nenni alls ekki í bæinn að versla. Mér finnst leiðinlegt í bænum að versla. Ég er að hugsa um að fara ekkert í bæinn nema þá í kvöld ef veðrið verður ekki snarvitlaust. Það eru nú meiri lætin í þessu veðri alltaf hreint! Hrmpf….

Ekki er nú húsið orðið fína en það mjakast nú í þá áttina skal ég segja ykkur. Og ég er alveg viss um að jólin komi þó ég verði ekki búin að gera eitthvað sniðugt.

Halda ró sinni það held ég að sé svolítið mikilvægt satt að segja!

Ég er búin að vera með svo mikinn höfuðverk síðan þarna um daginn þegar kennarastóllinn vildi ekki taka við mér. Fór í nudd í gær ummmmmm og fékk svo í mig nálar sem var verulega óþægilegt á köflum sérstaklega þegar þeim var stungið í hálsinn á mér – sem aftur rifjar upp fyrir mér þegar það var hægt að stinga í mig nálum út og suður og ég fann aldrei fyrir því! Batamerki er mér sko sagt en sem sagt eftir að þeim var sargað í hnakkann á mér og hálsinn og ég lifði það af fann ég bókstaflega hvernig rafmagnsleiðslurnar liggja um mig alla svei mér þá – og ég hef ekki fengið hausverk síðan! þetta er hreinlega magical þessar nálar!

Og ég er tveimur kílóum léttari en ég var fyrir 9 dögum síðan!

Og ég er bara svolítið glöð yfir því skal ég segja ykkur -búin að eiga í óttalegu basli við þessa vigt upp á síðkastið.

Lof jú farin að jólaundirbúast.

jól, Sund

Dagskrá

Nú dugir ekki annað en skipulag og afslappelsi hugans um leið:

Dagur 1 (í dag)

Þrífa húsið og koma því í jólabúning.
Þar með taldara skúffur í eldhúsi sem eru orðnar óleyfilega – já svona einhvern veginn öðruvísi en þær eiga að vera!
Klára Sörurnar sem döguðu uppi um síðustu helgi
Hringja og athuga með ísskáp
Koma jólatré inn
Fara í Blómaval og athuga hvort eitthvað fallegt skraut sé til á það (allt í einu á ég ekkert jólatrésskraut!)
Fara í sund og nudd – muna að frysta kortið mitt fram yfir áramót
Reyna að týna ekki sjálfri mér
Búa til merkilegan innkaupalista fyrir morgundaginn
Viðbót – gera ræðustúf
Vera tilbúin með Kiðjabergsdótið!

Dagur 2 (á morgun)

Fara til Reykjavíkur og versla ALLAR jólagjafir Þær eru allnokkrar!
Koma við hjá Ása
Koma við hjá Hlíf
Reyna að koma pökkum í Borgarfjörðinn
Fara í Hagkaup og athuga með matarinnkaup
Svo ekki sé minnst á BÓNUS!
Fara í fertugsafmæli um kvöldið – já sem þýðir að á degi 1 þarf ég að undirbúa hana
Vera komin ekki mjög seint heim

Dagur 3 – Þorláksmessa

Pakka inn gjöfum
Njóta lífsins
Fara í sund og SLAKA á
Sjóða hangikjöt ummmm nammi namm
Þorláksmessusnúningar

Þetta eru jólin!