Month: janúar 2012

Jæja þá er hvunndagurinn runninn upp – joga, vatnsleikmi og blak – já meira að segja blak. Ég hef ekki spilað blak af neinu viti síðan fyrir jól – áreiðanlega 2 mánuðir síðan ég var fulla æfingu… Ég hef sem sagt verið algjörlega frá í hnénu – og ég er að reyna að beina því í þann farveg að ég hugsi nú af alvöru um að léttast. Það gengur hins vegar á ýmsu. Ég verð að skrifa matardagbók – það er ekki nóg fyrir mig að passa mig og halda að ég sé að gera allt rétt en svo er oft einhver sprengja… Það kemur – það þýðir ekki að gefast upp….

En ég er mjög glöð yfir því að fóturinn er að lagast – ég fer í myndatökuna á morgun og svo sjáum við til hvað verður gert með hnéð. En svarið er alltaf það sama – léttast léttast og léttast – og halda svo áfram að hreyfa mig og styrkja. Ekki flókið eða hvað?

…ganga skrikkjótt 🙂 – En þau eru nú samt gerð. Og skulu vera gerð. Algjört lykilatriði að telja þetta saman og hafa í lagi! Dj… sem maður er fljótur að sleppa tökunum annars….

Ég er alveg handónýtí hnénu og búin að vera síðan fyrir jól – það er alltaf eitthvað. Nú hefur rope yogað hjálpað mér með mjaðmirnar þannig að ég veit varla af þeim – og þá kemur náttúrulega hnéð inn. Vonandi nýtast þeir verkir og helti mér til þess að leggja harðar að mér í því að léttast. Það þarf að styrkjast en ekki veikjast í andanum 🙂

Nú er norðurferð í pípunum – mikið hlakka ég til! Við Dísa verðum í viku við nám og kannski svona eilítið kigg á Herdísi Maríu – eða hvað ;).

Þar hlýtur mataræði að vera í algjöru himnalagi – býst ekki við öðru.

Bara spennandi.

Kveðja Inga fótalausa sem fann hækjuna hans Palla og styður sig við hana.

…
Þetta var það sem Baldur sagði við mig – einhvern tímann þegar mér ofbauð líkamsræktarálagið! Ég trúði honum svo sem – enda var hann ekki að skafa utan af því þá né nú!

Það er ekki nein hálftíma hreyfing við og við sem fellur honum í geð…

En það var nú ekki aðalmálið. Ég hef kviðið svo svakalega fyrir því að fara á vigtina eftir desember og jólin… Var helst á því að fara ekki neitt – en er nú orðin nokkuð þjálfuð í að eiga við  mína. Niðurstaðan er að 1,5 kg hafa bæst við – og það er innan marka þess sem mér var kennt að mætti búast við af slíku át tímabili. Ég er því sátt – og held áfram að paufast við að halda í við mig. Það er allmikið mál að minnka matarskammtana hjá konunni – en verður gert. Þetta er nefnilega bæði spurning um skammtastærðir og hvað er borðað þó síðari liður stæðunnar sé sem betur fer oftar í lagi en hitt…

Gærdagurinn var ágætur um margt! Ég fór í sundleikfimi, blak og sund. Blakið er held ég alveg út úr myndinni í bili – ég get ekkert notað vinstri fótinn og kem mér því ekki frá A til B – sama hversu stutt er á milli þeirra staða og snöggar hreyfingar eru alveg út úr myndinni. Ég get hins vegar synt og eftir að hafa verið smá í blaki – eða um 40 mín fór ég og synti í hálftíma eða svo. Þannig að hreyfingin í gær var 150 mínútur – sem er gott! En ég borðaði eins og hestur! Cok og prins – er maður í lagi – ónei. En þetta var allt skráð samviskusamlega niður og mér sýnist ég ekki hafa farið yfir orkuþörf dagsins en þessi dagur var ekki nýttur til þess að léttast – og ætlaði ég að hafa það svoleiðis – uuuuuuuuu held ekki!

Þannig að það er smá svigrúm til bætingar 😉 Dagurinn í dag er góður – eina er að ég er svakalega þreytt og lufsuleg eitthvað – já og get svona illa gengið, en ég skrifa hið fyrr nefnda á hve skart maður er að minnka skammtana eftir jólin – smá svona syfja kemur yfir mann.

En þetta er allt að koma – engin hreyfing í dag samt sem þýðir sund á morgun!

Þannig er það bara.

Jæja markmið ársins eru ekki flókin:

Léttast 12 kg.

• Leiðir:
• Matardagbók
• Vigtun sjálf eða hjá öðrum
• Hreyfing
• Taka ábyrgð á innkaupum og matseðlum

Stunda hreyfingu 6 daga vikunnar í 90 – 120 mínútur.
Ljúka mastersgráðunni.
Taka 1 áfanga í stjórnun næsta haust

fara á 4 – 6 vikna fresti til Akureyrar

Nýta mér vel bjargir:

• Sjúkraþjálfun
• Efni frá Reykjalundi
• Stuðningsnet vina og kunningja
• Blogg

Leiðir sem opnaðar hafa verið núna 4. janúar:

Blogga 😉
Hreyfingaáætlun

• Rope yoga í  Lifandi húsi 2 x  í viku
• Sundleikfimi hjá Vatni og heilsu 
• Salur á Borg – lyfta
• Sund – hjól 2 x í viku
• Má gjarnan vera þrisvar segir sjúkraþjálfarinn blessaður.
• Blak 1 x í viku (hnéð leyfir varla tvær æfingar).

Viðfangsefni lokaverkefnis er ljóst
Búin að koma mér í samband við þrjár lykilmanneskjur vegna þess

Ég er einnig búin að skrifa matardagbók í þrjá daga.

Þannig að áætlunin er bara nokkurn veginn á áætlun 🙂

Gaman að því!

Landinn á jóladag

….af bestu gerð! Við sálgæslu hunda í sprengjuóðum heimi ;). Þetta er búinn að vera hinn ágætasti dagur – var hálf lasin en kaffisopi hressti mig nú við  og svoldið af magatöflum!

Við elduðum frábæra humarsúpu og fylltar kalkúnabringur – alveg frábær matur! Ragnheiður var með okkur – rólegt og gott. Hún fór síðan yfir til Ingvars að njóta skoteldanna á því heimili – sem eru víst allnokkrir!

Jólin hafa verið alveg yndislegt – Aðalsteinn, Halldóra og Herdís voru hér með okkur fram á þriðja dag jóla – en annars höfum við haft það rólegt og gert mest lítið! Ég hef lítið hreyft  mig – en étið heilmikið! Og hugsað um lífsstílinn minn og smávægilega endurhæfingu sem ég þarf að taka þátt í varðandi þann hluta! Þetta liggur alveg ljóst fyrir um þessar mundir – svo er bara spurning hvað verður þegar muna þarf eftir ákvörðununum! En ég hlakka bara til áskorananna – og ég hlakka svakalega til þess að vinna að mastersverkefninu sem ég veit ekki alveg enn hvert á að vera! En ég er komin með  leiðbeinanda, ég er komin með leyfi fyrir 30 eininga verkefni og ég veit að ég þarf að vera komin með áætlun í annarri viku þessa ágæta árs! Þannig að vonandi kemur eitthvað frámunalega gáfulegt yfir mig í nótt! Ég held ég sé samt alveg ákveðin í að gera starfendarannsókn – spennandi.

Nánar um markmið 2012 innan tíðar!