Jólajólajólajóla

Ég býði alltaf kennurunum og starfsfólki sem ég vinn með til mín í jólaglögg – já já þó það sé gamaldags. Það er ekkert vesen segi ég – enginn matur og ekkert stúss þannig en … ég þarf að vera búin að skreyta allt og það er svolítill handleggur – því maður skreytir jú ekki skítugt hús! Nú svo þrífur maður svoldið og einhvern veginn þá draslast allt svoldið út þegar ég þríf – og því þegar allt er skreytt og fínt – þá er alltaf eitthvað svona sérkennilegt dót út um allt! Og þetta dót er bara einhvern veginn ekki hægt að færa eða gera neitt við fyrr en aaaaaaaallt er orðið næstum of seint!

En ég er þó búin að ýmsu sem var ekki búið á sama tíma í fyrra 🙂 Ég á bara eftir að setja upp svoldið útiskraut, taka heilmikið af drasli hér og hvar já og svona eitt og annað! Sjúkket að þetta er vesenislaust jólaglögg.

Og það er svo skemmtilegt að fá alla og hafa það notalegt og drekka heitan drykk! Nammi namm hlakka mjög mikið til. Í tilefni af því ætti ég að fara að TAKA til!

Ég hef ekki gert neinar sérstakar gloríur í mataræði í dag – en ekki hef ég nú borðað mikið grænmeti það verð ég að segja og eitt jólaöls glas hef ég drukkið – skil það ekki alveg því mér finnst það ekki einu sinni gott.

Nú fer ég og fæ mér svolítið kaffi ha humm ha og dúndrast svo í gegnum draslhaugana hér á mínum fimu fótum.

Mér tókst að sofa í rúma 5 tíma í nótt – nú eða tæpa sex, það er svei mér ekki mikið og hreinlega ekki nóg! En það kemur önnur nótt og ég ætla að æfa mig að sofa vel þá líka :-).